Индиски турист загина во судир на хеликоптери во регионот на Еверест во Непал

Индиски турист загина во судир на два хеликоптери во регионот на Еверест во Непал што се случи денеска, соопшти полицијата.

Судирот се случил откако елисите на хеликоптерите се удриле една во друга додека слетувале на хелиодромот во Периче околу 8:11 часот по локално време, изјави за ДПА помошникот подинспектор Мукеш Синг.

Маж (47) од јужната индиска сојузна држава Тамил Наду бил патник во хеликоптер на „Фиштајл ер“ (Fishtail Air) кој превезувал двајца патници и пилот. Тој починал на местото на настанот, додека другиот патник, Новозеланѓанец, со авион бил пренесен во Катманду за медицински третман, рече Синг.

Во Непал во последните години се случија десетици воздухопловни несреќи, што во голем дел се препишува на лошиот терен и слабата безбедносна евиденција во воздухопловството.

Непал, дом на осум од 14-те највисоки врвови во светот, моментално е во својата есенска сезона, која се смета за еден од најдобрите периоди за пешачење и планинарење во земјата, вклучително и во регионот на Еверест.