По години изолација САД воспоставија директни контакти со воените власти во Мјанмар

Администрацијата на американскиот претседател Доналд Трамп започнала директни разговори со воените власти во Мјанмар, дознаваат медиумите од американски претставници и други извори запознаени со преговорите.

Станува збор за голем пресврт во американската политика, која по воениот удар во 2021 година беше насочена кон меѓународна изолација на мјанмарските генерали.

Важна улога во воспоставувањето на контактите имал Мајкл Венс, помошник државен секретар за разузнавачки прашања и истражување. Разговорите засега се фокусирани на затворање центри за интернет измами насочени кон американски граѓани, но би можеле да отворат пат за поширока соработка, вклучително и пристап до мјанмарските наоѓалишта на ретки земни елементи, наведуваат седум сегашни и поранешни претставници и други извори запознаени со промената на американската политика.

Венс на 15 и 16 септември во главниот град Најпјидо учествувал во разговори со лидерот на воениот удар, актуелниот претседател на Мјанмар, Мин Аунг Хлаинг. Средбата била фокусирана на ослободување на американскиот претприемач Адам Кастиљо, но истовремено ја отворила можноста за натамошни контакти.

Тоа била средба на највисоко ниво од воениот удар во 2021 година и одраз на поширокиот пресврт во надворешната политика на Трамп, која од промовирање на демократијата се насочува кон прагматични односи засновани врз конкретни интереси.