Лекорни: Франција ќе ослободи 10 милиони барели дизел

Францускиот премиер Себастијан Лекорни денеска изјави дека Франција „ќе ослободи десет милиони барели дизел од своите стратешки резерви“ во текот на наредните три месеци, што се очекува да доведе до „пад на цената на дизелот од 10 до 18 центи“.

Лекорни изјави и дека претседателот на Франција Емануел Макрон „одржува низа дипломатски состаноци“ за да ги распореди „стратешките резерви“ нафта, пренесува Фигаро.

– Кога живеете далеку од работата, полнењето на резервоарот значително го оптоварува вашиот месечен буџет. Како што знаете, ги зголемивме субвенциите за возачите со голема километража. Енергетскиот ваучер ќе биде исплатен во јануари, а не на пролет, за најскромните домаќинства – рече Лекорни.

Тој изјави дека ги разбира барањата за намалување на даноците, но потсети дека повеќе од 70 милијарди евра беа потрошени за време на епидемијата на ковид-19 за помош на населението, како и дека националниот долг и понатаму се зголемува.

Говорејќи за економскиот раст, Лекорни рече дека смета оти целта на владата е да го намали јавниот дефицит на пет отсто.

– И покрај веќе преземените мерки, дефицитот се проектира на 5,5 отсто. Нашата земја старее, а нашиот пензиски систем соодветно на тоа се зголемува. Буџетот што го предлагаме вклучува закрепнување од 54 милијарди евра. Донесувањето на оваа одлука со праведна распределба на товарот ќе ни овозможи да планираме за целата земја – наведе Лекорни.