Македонските автори пред светската издавачка јавност на Саемот на книгата во Франкфурт

Во рамки на Саемот на книгата во Франкфурт, утре на македонскиот национален штанд ќе се одржи промотивен настан посветен на современата македонска книжевност и можностите за нејзина поголема меѓународна присутност.

Пред меѓународната професионална публика ќе бидат претставени македонските автори и актуелната книжевна продукција застапени во каталозите на Македонската асоцијација на издавачи (МАИ), која и годинава ја претставува македонската книжевност на Саемот на книгата во Франкфурт.

Посебен дел од настанот ќе биде посветен на можностите за превод и објавување на македонските дела на странски јазици. Пред странските издавачи ќе биде презентиран актуелниот Конкурс на Министерството за култура и туризам за финансирање превод и објавување домашни дела, како механизам за поддршка на нивната меѓународна афирмација.

Националниот штанд годинава е организиран во три сегменти. Првиот ги претставува современите македонски автори и нови книжевни наслови, вториот е посветен на делата што веќе се преведени и објавени во странство, а третиот на литературата за деца, преку каталог со избрани македонски автори и илустратори.

Саемот на книгата во Франкфурт, еден од најголемите светски собири на издавачката индустрија, започна денеска и ќе трае до 11 октомври. Во текот на саемските денови претставниците на издавачките куќи членки на МАИ ќе остварат средби со странски издавачи, литературни агенти, преведувачи и други професионалци од меѓународниот издавачки сектор, со цел воспоставување нови партнерства, продажба на авторски права и поттикнување преводи на македонски дела.