Бран апсења во Турција: Приведени 46 лица во антикорупциска акција насочена кон опозициската ЦХП

Турската полиција приведе 46 осомничени, меѓу кои и поранешен градоначалник на општина управувана од опозицијата во покраината Измир, во рамките на истрага за поткуп и местење тендери, објави државната новинска агенција Анадолија.

Обвинителството издаде налози за апсење на вкупно 48 лица под сомнение за формирање криминална организација, давање и земање поткуп и местење тендери, по што полицијата изврши претреси на повеќе адреси во пет покраини. Според наводите на Обвинителството, утврдено е дека учесниците на тендерите биле меѓусебно поврзани, дека одредени услуги биле фактурирани иако никогаш не биле извршени, а средствата потоа биле префрлани на приватни сметки на осомничените.

Во одделен случај, судот му одреди притвор и на градоначалникот на јужниот град Мерсин од редовите на опозициската Републиканска народна партија (ЦХП), Вахап Сечер, како и на уште двајца општински градоначалници. Според Анадолија, Обвинителството утврдило неправилности во 13 тендерски досиеја одобрени од Сечер.

Овие операции се најнови во низата акции насочени против ЦХП. Партијата оствари голем успех на национално ниво на локалните избори во 2024 година, освојувајќи клучни градови во кои дотогаш владееше Партијата на правдата и развојот (АКП) на турскиот претседател Реџеп Тајип Ердоган. Оттогаш, раководството на ЦХП беше сменето со судска одлука, а 90 нејзини пратеници ја напуштија партијата и формираа нова политичка формација.