Мајкл Мара ја презема лидерската позиција меѓу Шкотските лабуристи

Мајкл Мара е избран за лидер на Шкотската лабуристичка партија, заменувајќи го Анас Сарвар, кој поднесе оставка за да се приклучи на владата на британскиот премиер Енди Бурнам, пренесува ДПА.

Откако беше избран за лидер на Шкотските лабуристи – улога што Сарвар ја опиша како „најтешката работа во британската политика“ – Мара сега мора да се зафати со обидот да ја врати поддршката на гласачите за партијата, откако таа ги загуби петтите избори по ред.

Мара, кој е пратеник во шкотскиот парламент, го победи својот ривал за лидерската позиција, Џо Феган, со 4.266 наспроти 2.485 гласови.

Тој ја презема функцијата откако партијата во мај го доживеа својот најлош резултат во историјата на изборите за шкотскиот парламент, освојувајќи само 17 пратенички места, потсетува германската агенција.

Пред да влезе во политиката, Мара работел на Универзитетот во Данди, а во 2021 година станал портпарол за образование на Шкотските лабуристи.

Две години подоцна поранешниот советник од Данди станал портпарол на партијата за финансии.

Тој вели дека е „длабоко поврзан со лабуристите“, раскажувајќи им на членовите на партијата за време на кампањата дека како дете одел на синдикални маршеви со својата сестра и родителите.

Во својот победнички говор во Единбург, Мара изјави: „Да ми се довери раководењето со нашата Шкотска лабуристичка партија претставува исклучителна чест и голема одговорност.

„Благодарен сум за вашата доверба и ја преземам должноста да ја унапредувам нашата кауза за поправедна и порамноправна Шкотска, вложувајќи ги сите свои сили и можности.“

Изнесувајќи ја својата визија за Шкотските лабуристи под негово водство, Мара рече: „Наместо веднаш да посегнуваме по политички напади, треба да ги обединиме сите оние кои биле запоставени или разочарани, да градиме движења и сојузи и да носиме промени.

„Токму во тоа се состоеше успехот на Енди Бурнам во Манчестер. Сè започнуваше од луѓето и политиките, а не од партиската политика.“

Мара ја презема функцијата нешто повеќе од пет години откако беше избран во шкотскиот парламент како претставник на регионот Североисток, потсетува ДПА.