Иран тврди дека ја контролира Ормуската Теснина и дека за тоа нема да разговара со САД

Иран денеска соопшти дека и понатаму ја контролира Ормуската Теснина и дека не настојува да ги продолжи мировните преговори со САД откако американскиот претседател Доналд Трамп ја прекина двонеделната кампања на бомбардирање по совет на своите воени официјални лица.

По 13 последователни ноќи интензивно бомбардирање на цели во Иран, по што Техеран како одговор гаѓаше американски бази на Блискиот Исток, Трамп ја запре кампањата во текот на викендот. Иран соопшти дека и тој ќе ги паузира нападите сè додека трае американската пауза на бомбардирањето.

Одлуката на Трамп да ја прекине кампањата е донесена по совет на неговите главни воени официјални лица кои сметаат дека бомбардирањето, чија цел беше прекинување на иранската контрола врз теснецот, ги достигна границите на она што може да се оствари, изјави еден американски официјален претставник, како и повеќе американски медиуми.

Американскиот официјален претставник изјавил дека воените команданти му сугерирале на претседателот дека остануваат без цели. Тој изјави дека началникот на здружениот генералштаб, генерал Ден Кејн, исто така изразил загриженост поради трошењето на оружјето за воздушна одбрана кое се користи за заштита на американските бази во регионот.

Слични извештаи кои укажуваат на тоа дека цивилните и воените помошници му сугерирале на Трамп да ја запре кампањата пренесоа во текот на викендот Њујорк Тајмс, Си-Ен-Ен, Аксиос и други медиуми.

Американскиот амбасадор при ОН, Мајк Волц, вчера изјави дека Трамп ја паузирал кампањата за да даде простор за преговори.

Меѓутоа, портпаролот на иранското министерство за надворешни работи, Есмаил Багеи, денеска на прес-конференција изјави дека Иран не побарал продолжување на мировните преговори со САД.

Запирањето на американското бомбардирање доведе до пад на цените на нафтата, одразувајќи ја надежта дека нарушеното глобално снабдување би можело да продолжи. Референтната нафта Брент, чија цена за кратко скокна над 100 долари за барел минатата недела за првпат од мај, падна за околу 7,8 отсто до средината на претпладнето денеска на под 90 долари за барел.

Во јасен обид да испрати сигнал дека американското бомбардирање не ја остварило својата цел, Иран наведе дека тие и понатаму го контролираат најважниот светски пловен пат за енергетските пазари.

Неколку ирански државни медиуми пренесоа ист извештај наведувајќи „информиран извор“ според кого Иран утринава вратил шест брода кои „правеле прекршоци“ и се обиделе да поминат низ Ормуската Теснина без негова дозвола. Според иранските медиуми, еден од бродовите „имал несреќа“.

„Како што беше претходно објавено, сообраќајната рута во Ормуската Теснина е рута која ја одреди Иран, а другите контаминирани рути немаат излез“, пренесоа иранските медиуми.

Трамп ја почна својата најнова кампања на бомбардирање за да го казни Иран откако Техеран пукаше врз бродови кои ја користеа рутата во теснецот што ја промовираа Соединетите Американски Држави, во близина на брегот на Оман.

Иран вели дека бродовите мора да поминуваат само по рутата која оди поблиску до неговиот брег, која е под негова контрола и каде што има намера да воведе наплата за транзитните трошоци.

Вашингтон и Техеран во јуни постигнаа договор за рамката на преговорите кои требаше до крајот на август да ги решат главните спорни прашања, како што е иранската нуклеарна програма. Но, двете страни различно го толкуваа тој меморандум околу Ормуската Теснина: Вашингтон инсистира дека според договорот Техеран треба да дозволи слободно патување, додека Иран вели дека тој има овластувања да го надгледува теснецот.

Иран има намера да ја формализира својата контрола врз теснецот со постигнување договор со Оман, кој го контролира спротивниот брег. Висока делегација на Оман беше во Техеран во текот на викендот на разговор за иднината на теснецот.

Министрите за надворешни работи на Катар, Обединетите Арапски Емирати и Саудиска Арабија одделно имаа телефонски разговори со иранскиот министер за надворешни работи Бадр Албусаиди за Ормуската Теснина, според денешните извештаи во локалните државни медиуми.

Израелскиот премиер Бенјамин Нетанјаху, кој покрена војна со Трамп во февруари, но не учествуваше во американско-иранските преговори за нејзино завршување, треба да се сретне со американскиот претседател во Вашингтон оваа недела.