Градоначалник на париско предградие со поддршка за протестите на учениците: Протестите не се нови овде, тие се случуваат на почетокот на секоја учебна година

Градоначалникот на париското предградие Сен Дени, Бали Багајаоко, изјави дека за време на вчерашните протести во Париз, ги поддржал студентите од тоа предградие и побарал од полицијата да не ги напаѓа демонстрантите.
– Тие (полицијата) се решиле на јуриш и всушност ги нападнале студентите, од кои многумина не покажале никакво агресивно однесување кон полицајците – рече Багајаоко, член на крајно левичарската партија Непокорна Франција (LFI).

Тој додаде дека и покрај тоа, полицијата испукала солзавец кон демонстрантите, и кон него.

– Протестите не се нови овде, тие се случуваат на почетокот на секоја учебна година. Ветувањето на републиката за еднаквост, особено кога станува збор за работничките населби, но и руралните области, не се почитува – рече Багајаоко. Според него, владата треба да даде приоритет на инвестициите во образованието и да воведе повисоки даноци за милијардерите. Пораките од политичарите на власт дека партијата LFI стои зад протестите низ целата земја беа отфрлени од Багајоко како навредливи за демонстрантите.

– Средношколците кои беа на улица можеа да бидат мои деца. Моја должност е да бидам со нив – рече тој.

Предградието Сен Дени, каде што стапката на сиромаштија е повеќе од двојно поголема од националниот просек, беше едно од првите места каде што избувнаа студентски протести кон крајот на септември поради пренатрупаните и нестандардни училници, недостатокот на наставен кадар и нееднаквите можности за сите ученици.