Анкета: 67 проценти од Германците сметаат дека мандатот на Мерц како канцелар бил неуспешен, за 58 проценти бараат да поднесе оставка

Дури 67 проценти од Германците сметаат дека мандатот на Фридрих Мерц како канцелар бил неуспешен, додека 58 проценти од испитаниците рекле дека тој треба да поднесе оставка и од функцијата канцелар и од функцијата претседател на Христијанско-демократската унија (ЦДУ), според најновото политичко мониторирање на Ипсос спроведено за германското списание „Шпигел“.

На тврдењето „Мандатот на Фридрих Мерц како канцелар пропадна“, 48 проценти од испитаниците рекле дека целосно се согласуваат со тоа, додека уште 19 проценти рекле дека претежно се согласуваат. Ова го зголемува вкупниот удел на оние кои сметаат дека работата на Мерц како шеф на германската влада била неуспешна на 67 проценти.

Резултатите во источниот дел на Германија изгледаат особено неповолни за канцеларот. Во сојузните покраини што некогаш припаѓаа на ГДР, дури 80 проценти од испитаниците целосно или делумно се согласуваат со проценката дека мандатот на Мерц како канцелар е неуспешен. Во западна Германија, ова мислење го делат 64 проценти од испитаниците.

На испитаниците им беше поставена и изјавата дека „Фридрих Мерц треба да поднесе оставка од функцијата канцелар и претседател на ЦДУ“ – 44 проценти од испитаниците се согласиле целосно со оваа изјава, додека други 14 проценти се согласиле претежно, што значи дека 58 проценти од испитаниците ја поддржуваат оставката на Мерц. Според објавените податоци, само 11 проценти од испитаниците категорично ја отфрлаат можноста за негова оставка.

Незадоволството од работата на канцеларот го потврдува и најновото истражување на ARD „Deutschlandtrend“, спроведено од Infratest dimap. Според анкетата, само десет проценти од гласачите се задоволни или многу задоволни од работата на Мерц, што е најниската оценка за германски канцелар во историјата на анкетата од 1997 година. Дури 88 проценти од анкетираните рекле дека се помалку или воопшто не се задоволни од неговата работа.

Анкетата на Ипсос за „Шпигел“ е спроведена од 30 септември до 4 октомври на примерок од нешто повеќе од 2.000 испитаници, а објавените резултати покажуваат дека политичкиот притисок врз германскиот канцелар дополнително се зголемил по регионалните избори во септември.