Мерц под притисок: На повидок нов изборен неуспех на CDU додека AfD оди кон нова победа

Гласачите во Берлин и во Мекленбург-Западна Померанија денеска излегуваат на гласање на регионалните избори кои би можеле да бидат „болни“ за канцеларот Фридрих Мерц, по убедливата победа на крајно десничарската партија „Алтернатива за Германија“ (AfD) во Саксонија-Анхалт пред две недели, пренесува ДПА.

Гласањето во Берлин и во североисточната покраина Мекленбург-Западна Померанија го заокружува интензивниот политички календар во рамките на кој оваа година се одржаа избори во вкупно пет германски покраини. Резултатите од овие избори покажаа широко распространето незадоволство на јавноста од коалициската влада на Мерц и покренаа сериозни прашања за политичката иднина на канцеларот.

Избирачките места во Берлин и во Мекленбург-Западна Померанија се отвораат во 8:00 часот по локално време, а гласањето завршува во 18:00 часот. Во тоа време се очекуваат и првичните резултати од анкетите спроведени по излегувањето од избирачките места.

Дебаклот што претходно овој месец го доживеаја демохристијаните (CDU) на Мерц во Саксонија-Анхалт – каде што AfD забележа скок до речиси 44% од гласовите, додека поддршката за CDU падна на околу 17% – само ги засили гласините во конзервативните редови за можна „смена на канцеларот“.

Ново понижување за CDU би можело да уследи по днешното гласање во североисточната покраина Мекленбург-Западна Померанија, каде што партијата очајнички се обидува да го избегне својот најлош резултат досега на покраински избори. Според најновите анкети, партијата е малку над прагот од 5% потребен за влез во парламентот.

Откако со месеци водеше во анкетите, AfD се надева дека ќе го прекине владеењето на актуелната премиерка Мануела Швезиг од редовите на социјалдемократите (SPD).

Во Берлин, пак, партијата на Мерц би можела да ја загуби градоначалничката функција во корист на партијата „Левица“ (Die Linke) – наследничка на социјалистичката партија што владееше со поранешна Источна Германија – што би можело да биде „капката што ја прелева чашата“ за канцеларот кој се наоѓа во тешка положба, забележува ДПА.