Кремљ ги поздрави резултатите од парламентарните избори во Бугарија

Кремљ денеска официјално ги поздрави резултатите од парламентарните избори во Бугарија, на кои партијата „Прогресивна Бугарија“ на поранешниот претседател Румен Радев постигна убедлива победа.

Портпаролот на Кремљ, Дмитриј Песков, изјави дека Москва го гледа овој резултат како можност за обновување на „прагматичниот дијалог“.

„Секако ги поздравуваме изјавите на Румен Радев, кој победи на изборите, како и на други европски лидери, за подготвеноста за решавање на проблемите преку дијалог со Русија. Ова го сметаме за охрабрувачко“, рече Песков.

Тој додаде дека Русија „никогаш не одбивала дијалог“, но дека во Европа честопати немало реципрочен одговор.

Партијата „Прогресивна Бугарија“ постигна голем триумф на изборите, кои беа осми во последните пет години.

По пребројувањето на поголемиот дел од гласовите, Радев освои околу 44,5 проценти, што му дава значително парламентарно мнозинство и можност за формирање влада.

Либералната коалиција ПП-ДБ освои околу 15 проценти, додека ГЕРБ на поранешниот премиер Бојко Борисов падна на околу 13 проценти.

Румен Радев, поранешен пилот на МиГ-29 и долгогодишен претседател на Бугарија, го основа своето политичко движење по напуштањето на функцијата. Тој е познат по критикувањето на санкциите против Русија и застапувањето на „прагматичен пристап“ во односите со Москва.

Во својот победнички говор, тој рече дека граѓаните ги отфрлиле старите политички структури и манипулации.

Иако се спротивставува на директната воена помош за Украина, аналитичарите веруваат дека Радев нема целосно да ја блокира соработката во рамките на НАТО и ЕУ.

Се очекува модел сличен на оној на словачкиот премиер Роберт Фицо – политичка критика, но континуирана економска и индустриска соработка.

Бугарија останува важен снабдувач на муниција за Украина преку трети земји, додека нејзината воена индустрија продолжува да соработува со европски компании.

Радев претходно учествуваше во разговори за големи инвестиции во воената индустрија, вклучително и соработка со германскиот „Рајнметал“, што покажува дека бугарската политика се движи помеѓу политичката реторика и економскиот прагматизам.