Ванг: Кина ги повикува САД и Израел веднаш да ги запрат воените операции

Кинескиот министер за надворешни работи Ванг Ји му порача на својот ирански колега во телефонски разговор дека Пекинг го поддржува Техеран во одбраната од нападите на САД и Израел во услови на проширување на војната на Блискиот Исток. Преку серија разговори со колеги од Иран, Оман и Франција, Ванг го пренесе ставот на Кина за ескалацијата на конфликтот. 

Во разговор со иранскиот министер Абас Арагчи, Ванг истакна дека Пекинг „го негува традиционалното пријателство меѓу Кина и Иран“. Според извештајот на државниот радиодифузер ЦЦТВ, тој додаде: „Ние го поддржуваме Иран во одбраната на неговиот суверенитет, безбедност, територијален интегритет и национално достоинство, како и во заштитата на неговите легитимни права и интереси“.

Ванг објави дека Кина ги повикува САД и Израел веднаш да ги запрат воените операции. „Ги повикуваме САД и Израел веднаш да ги запрат воените операции, да избегнат понатамошна ескалација на тензиите и да спречат ширење на конфликтот во целиот регион на Блискиот Исток“, рече Ванг, според ЦЦТВ.

Во одделен разговор со министерот за надворешни работи на Оман, Бадр Албусаиди, Ванг ги обвини САД и Израел за „намерно поттикнување војна против Иран“, со што „се кршат целите и принципите на Повелбата на ОН“. Тој порача дека Кина е подготвена да преземе активна улога во решавањето на кризата.

„Кина е подготвена да игра конструктивна улога, залагајќи се за правда, мир и запирање на војната преку платформата на Советот за безбедност на ОН“, му рече Ванг на Албусаиди.