Јапонската ЛДП убедливо победи на парламентарните избори

Либерално-демократската партија на Јапонија на премиерката Санае Такаичи оствари убедлива победа на денешните парламентарни избори, со проекции дека ќе освои повеќе од две третини од местата во парламентот.

ЛДП, која имаше 198 места пред изборите, и нејзиниот коалициски партнер, Јапонската иновативна партија, речиси сигурно ќе освојат најмалку две третини од Долниот дом, со вкупно 310 или повеќе места, објавува „Џапан тајмс“.

Ова во суштина би ѝ овозможило на коалицијата предводена од ЛДП да ги надмине предизвиците што произлегуваат од недостатокот на мнозинство во Горниот дом.

Такаичи рече дека планира дополнително да го зајакне односот на нејзината партија со Јапонската иновативна партија.

„Составивме заеднички политички договор линија по линија со Јапонската иновативна партија, со која споделувавме сличен поглед на нацијата, кога бевме турнати во ќош откако партијата Комеито ја напушти коалицијата“, рече таа.