Двајца мртви при уривање кран, втор во два дена во Тајланд

Две лица загинаа кога градежен кран се урна на автопат во Тајланд, што е втора таква несреќа за два дена. 

Би-би-си пишува дека претходниот ден на другиот крај на земјата во идентична несреќа загинаа 32 лица.

Втората несреќа се случи денеска во Самут Сахон, предградие на Бангкок, каде што се урна кран што се користел за изградба на експресен пат. Снимката го прикажува моментот кога структурата се урна на автопатот смачкувајќи неколку автомобили.

Во несреќата што се случи вчера во североисточната провинција Нахон Ратчасима кран падна врз воз во движење, при што беа повредени повеќе од 60 лица.

Градежните работи на двете градилишта ги изведува иста компанија, „Италијанско-тајландски развој“, еден од најголемите тајландски градители. Овие инциденти повторно го доведоа во фокус проблемот со безбедноста на градилиштата во земјата од Југоисточна Азија, што делумно се припишува на слабото спроведување на прописите и безбедносните стандарди.

Во текот на изминатите седум години речиси 150 смртни случаи се регистрирани во проектот за подобрување на патиштата од Бангкок до југот на земјата. Француските медиуми пренесуваат дека експресниот пат на кој се случи денешното уривање се нарекува патот на смртта поради низа несреќи во последните години.

По вчерашната несреќа, тајландскиот премиер Анутин Чарнвиракул изјави дека ќе се справи со небрежноста во градежниот сектор. Државните железници на Тајланд исто така објавија дека ќе ја тужат компанијата „Италијанско-тајландски развој“.

Истата компанија беше одговорна и за изградбата на облакодер во Бангкок, кој се урна во март минатата година за време на земјотрес, додека ниедна друга зграда во градот не се урна.