Поезијата на Ана Голејшка-Џикова – централен книжевен настан во Љубљана

Поезијата на македонската поетеса Ана Голејшка-Џикова вчера била централен книжевен настан во Љубљана. Вистинските посветеници на поезијата во Љубљана, вчера два часа уживале во разговорот со неа, во нејзиниот настап и во нејзините стихови, во оригинал и во препев на словенечки јазик. Настанот „АД ХОК“, во градската библиотека „Отон Жупанчич“, којшто е еден од најважните настани во книжевниот живот на Словенија во целост беше посветен на поезијата на Голејшка-Џикова, а разговорот со неа го водела Соња Цекова-Стојаноска, која е авторка на препевите на нејзината поезија на словенечки јазик.

За време на поетското читање настапил и саксофонистот Јошт Драшлер, а визуелниот приказ на поезијата на Голејшка-Џикова го оствари илустраторката Полона Косец. Притоа, се случила вистинска синергија на различните форми на уметнички израз – настан од редок формат. Инаку, настанот бил модериран од Петра Коршич, која е авторка и кураторка на серијата настани „АД ХОК“.

– Учеството на еден ваков повеќеслоен настан кој прегрнува поезија, музика и слика е нешто што ми е блиско, што со задоволство го доживувам и му се радувам. Благодарна сум на организацијата за отстапениот простор, за проникливите прашања на Соња Цекова Стојаноска како и на целокупната енергија што ја заокруживме во библиотеката. За жена која сака да пее, ужива во визуелните сензации и притоа (не)случајно е поетеса, овој Ад Хок беше вистинска радост и задоволство. Како да зачекорувам во позната, динамична вода во која лековито исчезнува секоја грижа. Љубљана е таква. Таков беше и настанот, истакнува Голејшка-Џикова по синоќешниот настан.

Голејшка-Џикова денеска ќе има настап и на манифестацијата „Прешерново оро“ во Крањ.