Бугарија со ревидиран буџет: Нема зголемување на даноците, но се кратат 750 милиони евра за инфраструктура

Работодавачите, синдикатите и Владата постигнаа консензус за најспорните параметри во предлог-Буџетот за 2026 година, најави денеска на брифинг бугарската министерка за финансии, Теменушка Петкова.

Од параметрите што таа ги наведе, јасно е дека компромисот е постигнат врз основа на едноставна сметководствена логика – средствата што државата планираше да ги собере од зголемување на осигурителните придонеси за 2 процентни поени, од данокот на дивиденда и од фискалната контрола, ќе бидат укинати, што ќе доведе до кратење на капиталната програма за вкупно 750 милиони евра, посочува медиапул.бг.

Намалувањето од 750 милиони евра вклучува 450 милиони евра помалку национални средства и 300 милиони евра помалку европски средства, прецизира Петкова.

Највисоката основица за пресметка на придонеси (плафонот) ќе се зголеми на 2.300 евра (4.498,41 лева). Ова е малку пониско од првичниот предлог од 4.600 лева. Во моментот, плафонот е 4.130 лева.

Синдикатите се согласија да се укине дополнителното оданочување на бизнисот во замена за поддршка од страна на работодавачите за т.н. „хоризонтална политика“ за зголемување на приходите во јавниот сектор. Ова значи зголемување на средствата за плати за 10 отсто, при што секое министерство ќе ги распредели во согласност со индивидуалната оценка на работата на вработените.

За сметка на тоа, се укинува законската врзаност на платите со просечната плата во земјата преку автоматскиот механизам кој ги фиксираше платите во неколку сектори. Првично, министерката Петкова рече дека укинувањето на врзаноста ќе се случи само во секторите „Безбедност“ и „Одбрана“, но подоцна ги спомена „сите“ сектори каде што важи оваа формула. Ова ги вклучува и платите во високото образование, како и платите на наставниците. Сепак, кај наставниците, формулата се запишува во колективниот договор за труд, а не во законот, што можеби значи дека во средното образование ќе остане принципот платите да бидат еднакви на 125 отсто од просечната плата.

Првично, беше предвидено платите во јавниот сектор, освен оние со автоматска формула, да се зголемат за 5 отсто.

Вкупното зголемување на платите преку хоризонталниот механизам за 10 отсто ќе чини околу 1,4 милијарди евра (според податоците на КНСБ). За споредба, во првиот предлог-Буџет за 2026 година, вкупното зголемување на платите беше предвидено да чини околу една милијарда евра, односно значително помалку.