Од полноќ нови цени на горивата

Регулаторната комисија за енергетика, водни услуги и услуги за управување со комунален отпад (РКЕ) донесе одлука со која од 15 септември од 00.01 часот се менуваат максималните малопродажни цени на нафтените деривати.

Во просек, цените се зголемуваат за 2,86 проценти во однос на претходната одлука од 7 септември.

Според новата одлука, максималните цени ќе изнесуваат:

Еуросупер БС-95 – 100,50 денари за литар
Еуросупер БС-98 – 102,50 денари за литар
Еуродизел БС (Д-Е V) – 99 денари за литар
Екстра лесно масло за домаќинство (ЕЛ-1) – 109,50 денари за литар
Мазут М-1 НС – 48,243 денари за килограм
Дизелот поевтинува за 2 денари за литар, додека бензините Еуросупер БС-95 и БС-98 поскапуваат за 3,50 денари за литар.

Екстра лесното масло за домаќинство поскапува за 4,50 денари за литар, а мазутот за 2,242 денари за килограм.

Од РКЕ информираат дека референтните цени на нафтените деривати на светскиот пазар во однос на претходната пресметка се зголемиле во просек за 6,254 проценти кај бензините, 6,670 проценти кај дизелот, 5,881 процент кај екстра лесното масло и 6,773 проценти кај мазутот.

Во периодот според кој се формирани новите цени, курсот на денарот во однос на доларот е понизок за 0,188 проценти.

При пресметката се применети владините одлуки за намалена стапка на ДДВ од 10 проценти за Еуродизелот, како и намален акцизен износ за бензините за 2 денари за литар и за дизелот за 4 денари за литар.

Од РКЕ појаснуваат дека станува збор за максимални малопродажни цени. Трговците на големо и мало можат да ги формираат цените и под максимално утврденото ниво.