Би-Би-Си објави сведоштво на поранешна асистентка на Џефри Епстин за начинот на кој регрутирал жртви

Жена која со години работела како една од асистентките на осудениот сексуален престапник Џефри Епстин изјави за Би-Би-Си дека покојниот американски финансиер воспоставувал контрола врз жените преку психолошка манипулација, финансиска зависност, закани и изолација, опишувајќи го неговиот систем како „култ“ во кој тој бил водач.

Жената, претставена под псевдонимот Ања, изјави дека по осудата во 2008 година Епстин го променил начинот на регрутирање жртви и почнал главно да таргетира млади полнолетни жени од Русија и Источна Европа, ветувајќи им кариера во модната индустрија и деловни можности.

Според нејзиното сведоштво, таа влегла во кругот на Епстин преку модниот агент Даниел Сијад, по што финансиерот ѝ ветувал помош за манекенската кариера, организирал средби со луѓе од модната индустрија и постепено ја стекнувал нејзината доверба.

Ања тврди дека Епстин подоцна сексуално ја злоупотребувал и дека, откако станала една од неговите асистентки, тој контролирал речиси секој аспект од нејзиниот живот, вклучувајќи ги финансиите, сместувањето, контактите со други луѓе и пристапот до здравствена заштита.

Таа наведува дека асистентките му биле достапни 24 часа дневно, живееле во станови под негова контрола и биле целосно зависни од него, а сексуалната злоупотреба траела со години.

Ања дополнително го обвинува Епстин дека собирал компромитирачки материјали за жените, вклучително фотографии и видеоснимки, како и дека ги поттикнувал да пишуваат писма со благодарност, кои, според неа, служеле како дополнителен механизам за контрола.

Според нејзините наводи, Епстин ги охрабрувал своите асистентки да регрутираат нови млади жени, а меѓу нив намерно создавал недоверба за да спречи создавање поблиски односи и меѓусебна поддршка.

Таа раскажа и дека Епстин ја убедил да се подложи на хируршко отстранување на тетоважа, по што ѝ останале трајни лузни, а подоцна инсистирал и на дополнителна операција бидејќи не бил задоволен од резултатот.

Нејзините тврдења делумно ги потврди и поранешната соработничка на Епстин, Сара Келен, која претходно пред американските законодавци изјави дека тој систематски ја уништувал способноста на жените самостојно да носат одлуки и ги правел зависни од него.

Епстин почина во 2019 година во затвор во Њујорк, додека чекаше судење по обвиненијата за трговија со малолетнички заради сексуална експлоатација.

Ања и Келен подоцна добија обештетување од фондот за жртви формиран по неговата смрт.