Белград: Граѓаните се одзваа на повикот на студентите за чистење на Паркот на пионерите

Стотици граѓани пристигнаа во Пионерскиот парк уште пред 12 часот, одговарајќи на повикот на студентите кои побараа помош за чистење на т.н. „Ќациленд“, кој вчера беше размонтиран по поразот на Александар Вучиќ на предвремените избори во Србија.

Во големата работна акција учествуваат голем број граѓани, како и работници од белградските комунални служби.

Со кеси за ѓубре, ракавици и друга опрема, насобраните детално го чистеа паркот во кој немаа пристап речиси две години.

Додека голем број од нив чистеа, некои само седеа на клупите, велејќи дека уживаат во тоа што конечно паркот е „слободен“ по долгиот период во кој бил „окупиран“ со шатори на поддржувачи на доскорешната власт, поставени спроти Претседателството.

Во разговор за МИА, една постара госпоѓа вели дека иако не спиела цела ноќ од возбуда по победата на „Студентска листа – Студентите победуваат“, сепак, морала да дојде и да помогне, бидејќи работата допрва претстои.

На неа се надоврза студентка со засукани ракави и малку извалкано лице, која со насмевка ни рече: „Можеби тој е готов, но ништо не е готово. Вистинската работа допрва претстои.“

Забележавме и млади родители со своите деца кои им покажуваа каде да чистат и каде да го фрлаат отпадот. „Вака се сака Србија“, му се обрати еден татко на своето синче, кое со специјална алатка се обидуваше да ја искорне тревата покрај детското игралиште.

Радица (20) ја затекнавме како со своите пријатели се обидува да ги крене тешките метални заштитни огради, кои повеќе од 18 месеци им пречеа на луѓето да уживаат во својот парк. „Воопшто не сум изненадена од одзивот. Ова се пристојни луѓе. Ова е вистинската Србија“, посочи таа за МИА.