Во Тирана денеска почнува Muse-X, најголемиот фестивал на креативната индустрија во регионот

Во албанскиот главен град, Тирана, денеска почнува Muse-X, најголемиот фестивал на креативната индустрија во регионот и ќе трае три последователни дена и ноќи.

Muse-X е интегрирана платформа која обединува професионални изложби, меѓународна конференција и уметнички фестивал во едно единствено, сеопфатно и електрифицирачко искуство.

-На оваа голема платформа на креативната индустрија учествуваат 22 земји, кои ќе понудат 15 часа активност секој ден, на 120 штандови, од повеќе од 80 различни компании. Од САД и Обединетото Кралство, до Европа и Јапонија, Тирана се претвора во глобален центар на културата, музиката и филмот, со десетици професионалци од музичката и кинематографската индустрија, ангажирани на панели и работилници, објави Министерството за туризам, култура и спорт.

Фестивалот се одржува на мултифункционална сцена во просторот на познатиот објект Пирамида во Тирана и вклучува концертна програма, конференции, експо-презентации и професионални средби, со што создава можности за културна размена и нови меѓународни соработки.

Од легенди добитници на Греми награди како Дејвид Моралес, до меѓународни имиња од Sony Music и иконски медиуми како Mixmag, овој настан ќе ја донесе елитата на глобалните креативни индустрии во Тирана.

Ова издание е поддржано од Министерството за туризам, култура и спорт, како јасен доказ за инвестициите во креативната индустрија и позиционирањето на Албанија како важна културна дестинација на меѓународната мапа.

Се очекува Muse-X да собере повеќе од 20.000 учесници