СЗО: Седум случаи на хантавирус на крузер кај Зелениот ’Рт

Светската здравствена организација (СЗО) соопшти дека се потврдени два случаи на хантавирус, додека уште пет се сомнителни меѓу патниците на крузерот „Хондиус“, кој е блокиран во Атлантскиот Океан во близина на Зелениот ’Рт (Кабо Верде).

Околу 150 лица сè уште се наоѓаат на бродот, кој превезува претежно британски, американски и шпански туристи. Патувањето започна од Аргентина во текот на март. Седумте случаи ги вклучуваат трите досегашни жртви, еден пациент во критична состојба и тројца со полесни симптоми.

Починати се брачна двојка од Холандија и еден германски државјанин, додека британски патник бил евакуиран и се лекува во Јужна Африка.

СЗО соопшти дека се трага и по патниците од летот од островот Света Елена до Јоханесбург, со кој патувала починатата холандска двојка.