Поетското творештво на четворица автори од Куманово претставено во македонскиот КИЦ во Софија

Во Културно-информативниот центар на Република Северна Македонија во Софија вчера се одржа литературна средба во рамки на проектот „Нашето поетско ехо“, на која беше претставено поетското творештво на четворица автори од Куманово: Селајдин Шабани, Сунај Раими, Севдаиљ Демири и Емрах Билали, членови на Клубот на писатели „Јехона е Карадакут“ („Ехо на Карадак“).

КИЦ соопшти дека целта на проектот „Нашето поетско ехо“, поддржан од Министерството за култура и туризам на Македонија, е поддршка и афирмација на литературата надвор од националните граници и нејзино интегрирање во поширокиот балкански и европски културен контекст.

-Присутните имаа можност да уживаат во внимателно избрани поетски читања, преку кои секој од авторите го претстави својот уникатен светоглед. Нивните стихови носеа теми што произлегуваат од секојдневието, но се издигнуваат до универзални значења: љубовта, идентитетот, сеќавањето, времето и човечката судбина. Поезијата, како што се покажа и на овој настан, има моќ да ги надмине јазичните бариери и да допре до суштината на човечкото искуство. Особено значаен сегмент од средбата беше интеракцијата со публиката. Разговорите што следуваа по читањата создадоа простор за размена на мислења, интерпретации и лични доживувања, претворајќи ја вечерта во динамичен културен дијалог. Присутните имаа можност да поставуваат прашања, да дискутираат за инспирацијата на авторите и за предизвиците и перспективите на современото творештво, се наведува во соопштението. 

КИЦ на РСМ во Софија информира дека има долгорочна визија за манифестацијата „Нашето поетско ехо“ и дека очекува преку ваквите средби да се воспостават нови контакти со поети, книжевни критичари, преведувачи и издавачи.

-Овие врски може да прераснат во конкретни иницијативи – преводи на дела, заеднички поетски збирки, антологии и учества на меѓународни фестивали, со што се добива можност за поширока афирмација и видливост, позиционирајќи се како значаен дел од современиот европски културен мозаик. Настанот во Софија претставува пример за тоа како преку посветеност, визија и институционална поддршка може да се создадат вредни културни платформи, соопшти македонскиот КИЦ во Софија.