ЕК ја претстави новата стратегија за Арктикот

Европската комисија денеска ја презентираше нова арктичка стратегија, со цел да се осигури дека Европската Унија ќе биде во чекор со конкурентите додека се појавуваат нови бродски линии и можности за рударство, вклучително и експлоатација на клучни суровини.

– Арктикот е северното соседство на Европа, блиско, поврзано и клучно за нашата иднина. И се менува, со нови бродски линии и ресурси кои ја поттикнуваат стратешката конкуренција, истакна претседателката на ЕК, Урсула фон дер Лајен.

Таа додаде дека „Арктикот е област каде што се судираат тектонските плочи на геополитиката“.

Лајен предупреди дека растечкото воено присуство на Русија во Арктикот, хибридните активности против нејзините соседи и трансформацијата на безбедноста во регионот влијаат на ЕУ како целина.

– Пристапот до арктичките морски линии и природните ресурси е од стратешки интерес за ЕУ, посочи високата претставничка на ЕУ за надворешни работи и безбедносна политика, Каја Калас.

Една од целите на стратегијата е зајакнување на економската соработка и ублажување на ефектите од климатските промени.

Арктикот се менува брзо, се затоплува речиси четирипати побрзо од глобалниот просек, влијаејќи на екосистемите и менувајќи ги начините на живот и заедниците. Новите бродски рути и откриените ресурси го преобликуваат безбедносниот и економскиот пејзаж на Арктикот, што доведува до зголемени геополитички тензии, стратешка конкуренција и воена активност.

Прв приоритет на стратегијата е зајакнување на безбедноста и отпорноста на Арктикот. ЕУ има намера да поддржи воспоставување центар за следење, заштита и помош во поправката на подморските кабли во Северниот Атлантик и Арктикот. Според стратегијата, овој центар на крајот би се надградил во центар за поморска безбедност, кој би им помогнал на земјите-членки на ЕУ и земјите-партнери да ги следат поморските активности во областа.

Безбедносните цели вклучуваат зголемување на бројот на мразокршачи во сопственост на европските земји и подобрување на воената мобилност во регионот.

Во областа на зајакнување на економската безбедност и просперитет на Арктикот, ЕУ ќе продолжи да го поддржува развојот на обновливи извори на енергија, а воедно ќе ја задржи својата посветеност да не вади или купува фосилни горива од регионот.