Младите исцртаа мурал за соживот во летниот амфитеатар во Гостивар

Невладината организација Иницијатива за граѓански интеграции (ИГИ) Гостивар како дел од проект за соживот и заедништво постави мурал на летниот амфитеатар во Градскиот парк во Гостивар. Активноста беше реализирана со учество на млади од различни етнички заедници, чија цел беше поттикнување на интеркултурниот дијалог, креативното изразување и активното учество на младите во локалната заедница.

Муралот е изработен врз основа на идеи на младите, кои преку уметност ја претставија својата визија за заедништво, културна разновидност и соживот во Гостивар.

– Овој мурал претставува симбол на заедништво и заедничка визија на младите за подобар и поврзан град, изјавија од Иницијатива за граѓански интеграции (ИГИ) Гостивар.

Од ИГИ посочуваат дека проектот „Култура за развој“ го поддржува независниот културен сектор во земјава, и е поддржан од Владата на Швајцарија, а се имплементира од страна на Хартефакт Фонд од крајот на 2024 година.