Шведско-македонската стопанска комора отвора канцеларија во Кисела Вода

Градоначалничката на Кисела Вода Бети Стаменкоска Трајкоска денеска во просториите на Општината оствари средба со извршниот директор на Шведско-македонската стопанска комора, Самуил Наумовски Викиус.

Како што се наведува во соопштението на Општината, оваа стопанска комора, која официјално започна со функционирање во октомври минатата година наскоро ќе ја отвори својата канцеларија во населбата Црниче, токму на територијата на општина Кисела Вода.

-Зад комората стојат 35 етаблирани шведски компании кои имаат јасна визија и желба да бидат економски мост помеѓу Шведска и Македонија. Токму овој економски мост е клучниот столб околу кој ќе се развива идната соработка со домашната бизнис заедница. Оваа средба претставува прв чекор кон реализација на заедничките цели за поддршка на стопанството и отворање нови пазари за локалните компании – се вели во соопштението.

Ваквите активности, додаваат од Општината, се во директна корелација со програмата на градоначалничката Стаменкоска Трајкоска во делот за Локална стратегија за економски силна општина. Во соопштението се нагласува дека преку проекти за унапредување на локалната бизнис клима, Општината активно работи на подобрување на инфраструктурата, модернизација на административните услуги и директна поддршка на малите и средни претпријатија. Целта, додаваат оттсаму, е да се унапредат условите за поефикасно водење бизнис, зголемена конкурентност и привлекување на нови инвестиции, кои ќе резултираат со нови работни места и одржлива локална економија.

-Оваа иницијална средба го потврдува нашиот фокус кон економскиот развој и градењето стабилни партнерства. Фактот што Шведско-македонската стопанска комора ја отвора својата канцеларија токму кај нас, во Кисела Вода, потврдува дека како општина создаваме услови кои се препознаени од меѓународната бизнис заедница. Нашата намера е да бидеме активна поддршка на овој економски мост што се гради меѓу шведските компании и македонското стопанство. Преку мерките за модернизација и поддршка на малите и средни претпријатија кои се дел од нашата стратегија, обезбедуваме основа за нови инвестиции и долгорочен економски раст. Кисела Вода продолжува да се позиционира како општина која активно ги поддржува деловните иницијативи и гради стабилна основа за просперитет на сите граѓани – изјавила градоначалничката Бети Стаменкоска Трајкоска.