Бербок: Меѓународниот поредок не е само под притисок, туку е и нападнат

Меѓународниот поредок не е само под притисок, туку е и нападнат, изјави претседателката на Генералното собрание на ОН, Аналена Бербок, во говорот во пленарната сала на Европскиот парламент во Стразбур.

Бербок рече дека во современиот свет, конфликтите не се водат во самоодбрана, туку како предизвик за светскиот поредок. Во клучен момент, некои сили се повлекуваат од меѓународните организации, а принципите што се сметаат за непроменливи се доведуваат во прашање, истакна таа.

Германката рече дека за нивно правилно функционирање, на ОН им е потребен целиот свет, вклучително и Европа. Заедно со Европа, ОН се повикани да ја бранат вистината во свет каде што лажните вести и дезинформациите се насекаде. Таа нагласи дека единството е клучно во меѓународната соработка и како пример го даде усвојувањето на првиот пакет санкции на ЕУ против Русија поради инвазијата на руските сили во Украина во февруари 2022 година.

Таа рече дека единството што го демонстрираше ЕУ во тоа време беше во име на зачувување на светскиот поредок и мирот во светот. На крајот од својот говор, Бербок нагласи дека почитувањето на човековите права е клучно за живеење во мир и просперитет.

На нејзиниот говор му претходеше изјава од претседателката на Европскиот парламент, Роберта Мецола. Таа кажа неколку зборови за улогата на ООН во светот. Таа нагласи дека ООН постигнала одлични резултати за кои малку се зборува.

-Соработката во контекст на мултилатерализмот ја гарантира нашата безбедност и просперитет. Европскиот парламент е изграден врз принципот на соработка и поради оваа причина ООН секогаш ќе има партнер, рече Мецола.