Судири меѓу белгиските демонстранти и полицијата на антивладини протести во Брисел, приведени девет лица

Белгиската полиција употреби солзавец и бибер-спреј во судирите со антивладините демонстранти во саботата, барајќи подобри услови во образовниот систем, објавија белгиските медиуми.

Судирите се случија додека стотици претежно млади демонстранти се собраа на протестот, последен во серијата одржани последните месеци, повикувајќи на подобро финансирање на образовниот систем и обвинувајќи ја полицијата за прекумерно насилство.

Судирите беа многу помали и помалку насилни од оние што се случија минатата седмица во Белгија и, во многу поголем обем, во соседна Франција.

Во еден инцидент во Брисел во саботата, демонстрантите се разбегаа и паѓаа на земја додека полицијата ги бркаше, а полицајците удираа еден демонстрант, објави Reuters.

Демонстрантите фрлаа улични знаци и други предмети врз куп скутери и велосипеди за изнајмување во обид да ги запалат.

Во друг инцидент, полицијата употреби солзавец за да ги растера демонстрантите, објавија неколку белгиски медиуми.

Бриселската полиција доцна попладнето соопшти дека немало поголеми инциденти. Тие рекоа дека презеле мерки за „гарантирање на јавниот ред и безбедноста на сите“.

Полицијата привремено притвори пет лица за нарушување на јавниот ред и мир, а уште четири други за поседување забрането оружје и поттикнување немири, се вели во соопштението.