Цените на нафтата скокнаа поради геополитичките ризици и можни нарушувања во снабдувањето

Цените на нафтата денеска скокнаа за речиси три отсто, со што го достигнаа највисокото ниво во последните 12 недели, поради тоа што геополитичките ризици ја зголемија можноста за нарушување во снабдувањето.

Цената на нафтата Брент се движеше околу 65,6 долари за барел, а на американската сурова нафта WTI (West Texas Intermediate) околу 61,16 долари за барел, пренесе Трејдинг економикс.

Реториката на американскиот претседател Доналд Трамп во врска со Иран придонесе за претпазливоста кај инвеститорите.

Трамп најави откажување на состаноците со ирански официјални лица додека не запрат протестите и предупреди дека „помошта е на пат“.

Овие потези доаѓаат набрзо по воведувањето царина од 25 отсто на стоки поврзани со Иран, што ги зголеми стравовите од регионални тензии кои би можеле да влијаат на протокот на нафта.

Цените исто така пораснаа поради прекините на терминалот на Каспискиот нафтоводен конзорциум во Казахстан, каде комбинацијата на лошо време, одржување и напади со дронови речиси го преполови товарот на околу 900,000 барели дневно.