Ишингер: АфД мора да учествува во дебатата на Минхенската безбедносна конференција

Претседателот на Минхенската безбедносна конференција, Волфганг Ишингер, ја бранеше одлуката да се покани крајно десничарската Алтернатива за Германија (АфД) на годинашниот собир во февруари, по повторените критики од САД дека европските земји и институции ја ограничуваат слободата на говорот.

Ишингер, кој е поранешен германски дипломат, рече дека вклучувањето на „двајца или тројца експерти за надворешна политика“ од АфД, кои не беа поканети во последните две години, нема да ѝ наштети на конференцијата и ќе „го израмни теренот за игра“, објавија британските медиуми.

Ова нема да дозволи АфД повторно да се претстави како жртва, маргинализирана и исклучена од германскиот политички живот“, изјави Ишингер во интервју за Ројтерс во Берлин.

Германските разузнавачки служби минатата година ја класифицираа АфД како „екстремистичка“ организација.

Сепак, според анкетите, партијата моментално ужива највисока поддршка од гласачите во земјата и ја претставува главната опозициска сила во Бундестагот.

Ишингер рече дека поради ова, тешко е да им се објасни на странските учесници зошто нивните претставници не треба да дискутираат на конференцијата.

Тој нагласи дека не се согласува со надворешната политика на АфД, особено со нејзиното противење на западната воена помош за Украина, но додаде дека „присуството на дебатите во Минхен би можело да има и едукативен ефект“ врз нејзините претставници.

АфД ги зајакнува врските со движењето „Да ја направиме Америка повторно голема“ (MAGA) на Трамп во текот на изминатата година и претставува сè поголем предизвик за конзервативците на канцеларот Фридрих Мерц, особено пред покраинските избори во 2026 година.

Минатогодишната Минхенска безбедносна конференција беше обележана со остри критики од американскиот потпретседател Џ.Д. Венс, кој ги обвини европските лидери за задушување на слободата на говорот и неуспех во контролата на имиграцијата.

Неговите коментари, како и средбата со лидерката на АфД, Алис Вајдел, ги вознемирија европските сојузници.

Ишингер рече дека сè уште не е познато дали Венс ќе присуствува на годинашната конференција, но нагласи дека целта на состанокот е да се справи со „тешките трансатлантски прашања“.

„Доколку дојде, се надевам дека ќе ја искористи можноста да ги објасни сегашните и идните одлуки на американската надворешна политика, од кои некои во Европа бараат многу дополнителни објаснувања“, заклучи Ишингер.