Во ЕУ во пренатрупани домаќинства живеат 16,9% од луѓето, во регионот сме со најмала пренаселеност

Лани 16,9 проценти од луѓето во ЕУ живееле во пренаселени домаќинства што претставува намалување во однос на 2014 година кога таа стапка изнесувала 18,1 отсто, соопшти Европската статистичка агеција – Евростат.

Според Евростат, стапката на пренаселени домаќинства е значително повисока во Западниот Балкан, при што најниска е во земјава и изнесува 38,1 отсто.

Во Србија во пренаселени домаќинства живеат 46,6 проценти од граѓаните, во Албанија 57,1 а во Црна Гора дури 61,6 отсто. За Босна и Херцеговина и Косово нема податоци.

Повисока стапка на пренаселеност на домаќинства од 30 отсто се бележи и во пет земји членки на ЕУ, при што таа е највисока во Романија и изнесува 40,7 проценти, по што следуваат Летонија со 39,3, Бугарија со 33,8, Полска со 33,7 и Хрватска со 31,7 отсто.

Од друга страна, најниски стапки на пренатрупаност на домаќинствата од 2,4 проценти има на Кипар, по што следуваат Малта со 4,4, Холандија со 4,6, Ирска со 5,0 и Белгија со 6,5 отсто.

Во Шпанија таа стапка изнесува 9,1 проценти, во Франција 11,5, во Германија 10,4, во Унгарија 14,6, во Италија 23,9, а во Грција 27 отсто.

Според дефиницијата на Евростат, за едно лице се смета дека живее во пренаселено домаќинство, ако тоа домаќинството има само една соба, ако самец на возраст од најмалку 18 години живее во една соба или ако семејство има само по една соба на двојка или на две деца на возраст до 17 години.