Кралот Чарлс изрази „длабока лична тага“ поради трансатлантската трговија со робови

Британскиот крал Чарлс Трети денеска изрази најдлабока лична тага поради трансатлантската трговија со робови, опишувајќи ја како срамен дел од историјата кој и натаму фрла сенка врз земјите членки на Комонвелтот.

Обраќајќи се на Самитот на шефовите на влади на Комонвелтот (CHOGM) во Антигва, британскиот монарх истакна дека историјата ги носи со себе и достигнувањата и неуспесите на претходните генерации, додавајќи дека нивните последици се чувствуваат и денес.

– Историјата не е нешто што можеме да го избереме или да го промениме. Таа ни е оставена во сложено наследство од предците што никогаш не можеме да ги запознаеме. Нашето наследство ги вклучува и нивните достигнувања и нивните неуспеси, доброто што го направиле, но и неправдите. Не можеме да ги промениме постапките на оние што живееле пред нас, но можеме да учиме од минатото – рече тој.

Говорејќи за својот личен однос кон историјата на ропството, кралот нагласи дека тој срамен дел од историјата му го исполнува срцето со ужас, а душата со најдлабока лична тага, додавајќи дека трансатлантската трговија со поробени луѓе и натаму фрла сенка врз тие острови и останатите членки на Комонвелтот.

Тој ја истакна и улогата на оние кои се бореле за ставање крај на меѓународната трговија со робови, посочувајќи дека историјата покажала оти карактерот и храброста можат да ја надминат и најмонструозната неправда, при што Кралската морнарица имала водечка улога.

Изјавата на кралот доаѓа откако британскиот премиер Енди Барнам навести дека би бил отворен за можноста монархот официјално да им се извини на земјите од Комонвелтот за ропството, предлог на кој конзервативците остро се спротивставија