Израелските опозициски партии преговараат за формирање влада

Лидерите на израелските опозициски партии денеска разговараа за формирање на влада. Средбата е организирана еден ден пред консултациите на партиите со претседателот на Израел, Исак Херцог.

На средбата учествуваат лидерите на партиите Јашар, Заедно, Израел наш дом и Демократите. Тие генерално се согласуваат дека мандатот за формирање нова влада треба да му се даде на лидерот на Јашар и поранешен началник на кабинетот Гади Ајзенкот.

– Се соочуваме со сериозен и опасен обид за поткопување на резултатите од изборите. Мора да формираме влада. Дејствијата од последните неколку дена се само уште еден потсетник дека мора да го отстраниме Нетанјаху од позицијата премиер, наведе Јаир Лапид, кој е втор на листата на Заедно.

Херцог наведе дека пред утрешните консултации со политичките партии тој ќе се сретне со лидерите на најмалите партии „за да се овозможи сеопфатно разгледување на сите достапни опции“.

На предвремените парламентарни избори во Израел, одржани на 27 октомври, блокот партии околу актуелниот премиер Нетанјаху освои 53 места, а Ликуд е најголемата поединечна партија, со 27 места. Опозицискиот блок предводен од Гади Ајзенкот освои 48 места, а неговата партија Јашар има најмногу места – 21. Арапските и палестинските партии освоија 19 места.

Во соопштението од Демократите се наведува дека тема на разговорите биле и „клучните прашања што ја засегаат арапската јавност и потребата од наоѓање конкретни решенија“.

Лидерот на Демократите, Јаир Голан претходно отворено ја поддржуваше соработката со арапските партии за формирање влада, истакнувајќи дека тие би можеле да станат дел од идна коалиција.

– Реалноста мора да нè научи силна лекција: немаме иднина тука освен ако не престанеме да се плашиме. И освен ако не престанеме да бидеме расисти. Повеќе не смееме да ја прифаќаме расистичката поделба на Нетанјаху на еврејски гласови и арапски гласови, објави Голан на платформата Икс.

Лидерот на Израел наш дом, Авигдор Либерман вчера ја одби понудата од партијата Ликуд на Нетанјаху да се придружи на неговата коалиција.

– Свесен сум за потребата за формирање на влада, но не му верувам на Нетанјаху. Тој мора да замине, посочи Либерман.

Тој наведе и дека неговата партија нема да коалицира со двете арапски партии.