Свиндал го засили стручниот штаб на Норвешка

Легендата на норвешкото алпско скијање Аксел Лунд Свиндал му се приклучи денеска на тренерскиот штаб на националниот тим.
Свиндал, кој е последниот Норвежанец што освои олимписко злато во алпско скијање во 2018 година, истакна дека го прифатил предизвикот со скратено работно време по предлог од стручниот штаб на репрезентацијата.
„Кога спортистите и тренерите ми пристапија ова лето со конкретен предизвик и предлог за тоа како би можел да придонесам, мислев дека звучи многу возбудливо“, рече 43-годишниот Свиндал, кој ја заврши кариерата во 2019 година поради хронични повреди на коленото.
Свиндал, кој беше опериран во 2022 година откако му беше дијагностициран рак на тестисите, беше дел од тренерскиот тим на Линдзи Вон пред Зимските олимписки игри оваа година.
На Игрите во Ванкувер во 2010 година, Свиндал освои злато во супер-велеслалом, сребро во спуст и бронза во велеслалом. Осум години подоцна, во Пјонгчанг, се закити со златниот медал во спуст.
Норвешка на Зимските олимписки игри во Милано и Кортина на почетокот на оваа година освои само два медала во алпско скијање, еден сребрен и еден бронзен.