Експлозија погоди уште едно складиште за оружје во Бугарија

Силна експлозија предизвика пожар во складиште за оружје во централна Бугарија преку ноќта, објавија локалните медиуми и официјални лица во саботата. Ова беше втора експлозија во воен објект последните седмици.

Нема извештаи за повредени во пожарот во близина на селото Царева Ливада, а локално емитуваните видеа покажаа како пламенот го осветлува ноќното небо.

Информацијата за најновиот инцидент на локацијата на компанијата за оружје на Емилијан Гебрев официјално ја потврди Славчо Димиев, еден од директорите на компанијата, за НоваТВ. Муницијата се запали на засегнатото место. Жителите во близина, исто така, слушнаа серија експлозии.

За среќа, магацините биле празни и никој не беше повреден. Имало само двајца обезбедувачи кои веднаш ја напуштиле областа. Системот BG-Alert бил активиран и по наредба на регионалниот гувернер на Габрово. Општина Дрјаново објави дека патот Габрово – Царева Ливада е затворен. Селото каде што избувна пожарот во магацинот за оружје се наоѓа на околу 4-5 километри од Царева Ливада.

„Пожарот, видлив од Велико Трново, избувна околу 23:20 часот во магацин на воен погон лоциран меѓу Трјавна и Царева Ливада“, потврди градоначалникот на Велико Трново, Даниел Панов, на социјалната мрежа X.

„Во моментов, пожарот се прошири во магацинскиот простор на фабриката. Се движи од складиште до складиште“, изјави за новинарите гувернерката на регионот Габрово, Кристина Сидорова, во раните утрински часови во саботата.

Локалните медиуми објавија дека пожарот избувнал на локација управувана од EMКO, која претрпе експлозија во друг објект минатиот месец, цитирајќи службено лице на EMCO.

EMКO го води бугарскиот трговец со оружје Емилијан Гебрев, за кого бугарските обвинители велат дека во минатото бил цел на напади врз неговите објекти од страна на руски оперативци.

Бугарија издаде налози за апсење во 2024 година за шест руски државјани обвинети за вмешаност во уништувањето на складиштата за оружје на EMКO во кои се складирала муниција за извоз во Украина и Грузија меѓу 2011 и 2020 година.

Обвинителите во тоа време изјавија дека постои основано сомневање за врска меѓу експлозиите во Бугарија, обидот за труење на Гебрев во 2015 година и експлозиите во складиштата за муниција во Чешка во 2014 година. Русија децидно ги отфрли овие обвинувања.