Хрватска гради фабрика за муниција во партнерство со реномираниот гигант Берета

Владата на Хрватска вчера даде поддршка за соработка на проектот за воспоставување производство на муниција од мал калибар во земјата, во партнерство со реномираната италијанска компанија „Берета холдинг“ (Beretta Holding).

Со донесениот заклучок се поддржува изградбата на фабрика за муниција во Хрватска, а Министерството за одбрана е задолжено, во соработка со повеќе ресори, во најкраток рок да ги преземе сите потребни дејства за потпишување на меморандум за разбирање со „Берета холдинг“.

Во процесот се вклучени министерствата за финансии, за надворешни работи, за внатрешни работи, за правда, како и ресорите за економија и зелена транзиција.

Потпретседателот на Владата и министер за одбрана, Иван Анушиќ, изјави дека Владата ја носи оваа одлука токму поради променетите безбедносни околности во регионот и во светот.

Пред само седум дена, во Владата беше потпишан и Договор за заем во рамките на безбедносната иницијатива за Европа (SAFE), вреден милијарда и седумстотини милиони евра. Премиерот Андреј Пленковиќ тогаш појасни дека овие средства ќе бидат инвестирани во набавка на германски тенкови „Леопард“, француски хаубици „Цезар“, чешки камиони за транспорт и логистика на хрватската војска, како и во различни видови муниција.