„Рапсодија“ – концерт за четирирачно пијано во Македонската филхармонија

Љубителите на класичната музика на 13 мај ќе имаат можност да уживаат во несекојдневен музички настан во Камерната сала на Македонска филхармонија. Со почеток од 20 часот ќе се одржи концертот „Рапсодија“, посветен на магијата на четирирачното пијано. Пред публиката ќе настапат пијанистките Марија Ѓошевска и Славица Мицовска-Смилевска, кои преку внимателно избрана програма ќе понудат вечер исполнета со емоции, виртуозност и музичка префинетост. На програмата се дела од светски познатите композитори Волфганг Амадеус Моцарт, Едвард Григ, Морис Равел и Бете Илин, чии композиции ќе ја доловат богатата палета на класичниот музички израз. Покровител на концертот е Министерството за култура и туризам, а влезот е слободен за сите посетители. Настанот претставува одлична можност љубителите на уметничката музика да доживеат вечер исполнета со енергија, страст и врвна пијанистичка изведба.