Кремљ: Виткоф и Кушнер наскоро во Москва на разговори за завршување на војната во Украина

Кремљ очекува брзо продолжување на американското медијаторство за завршување на војната во Украина по сегашното тридневно примирје, изјави денеска за државната телевизија Јуриј Ушаков, советник на рускиот претседател Владимир Путин задолжен за преговорите, пренесе ДПА.

Ушаков најави дека специјалниот претставник на САД Стив Виткоф и зетот на претседателот Доналд Трамп, Џаред Кушнер, ќе пристигнат во Москва „наскоро“, без да прецизира конкретен датум.

– Порано или подоцна, мислам дека набрзо, нашите колеги Стив Виткоф и Кушнер ќе пристигнат во Москва. Ќе го продолжиме дијалогот со нив, рече Ушаков.

Тој посочи дека примирјето, кое е во сила до понеделник, е договорено во телефонски разговори со САД, кои, како што наведе, не биле лесни.

– Договорот беше постигнат во текот на тешки преговори. Два дена водевме телефонски разговори со нашите американски колеги, додека Американците беа во контакт со Киев. Сето ова не беше лесно, изјави Ушаков.

Виткоф и Кушнер и претходно посредуваа во разговорите меѓу Русија и Украина, но без да постигнат пробив.

Ушаков повтори дека Русија е подготвена да ја заврши војната ако Украина се повлече од регионот Донбас.

– Во Украина, тие знаат дека мора да го сторат тоа, а порано или подоцна ќе го направат тоа секако, рече Ушаков.

Украинскиот претседател Володимир Зеленски постојано го отфрла ова барање на Русија, а руските сили досега не успеаја да ги освојат стратешки важните градови Краматорск и Славјанск во Донецк, кои Украина ги смета за клучни за заштита на приодите кон Киев.

Во меѓувреме Москва и Киев меѓусебно се обвинуваат за прекрушвање на тридневното примирје склучено со посредство на САД.