Стармер по тешкиот пораз на локалните избори: Не се повлекувам

Британскиот премиер Кир Стармер, откако неговата Лабуристичка партија претрпе тежок пораз на локалните избори, денеска објави дека останува на чело на Велика Британија и ќе ја продолжи борбата за „промени“ во земјата.

Помалку од две години по историски убедливата победа на општите избори, гласачите ја казнија лабуристичката влада на Стармер на локалните избори, нанесувајќи им удар и на некои од нејзините традиционални упоришта во поранешните индустриски региони на централна и северна Англија.

И покрај загубите, сојузниците на Стармер изразија поддршка за политичарот чиј рејтинг на одобрување е меѓу најниските досега забележани за еден британски лидер.

Премиерот посети една од ретките успешни изборни единици за оттаму да објави дека продолжува понатаму.

„Нема да се повлечам“, им изјави тој на новинарите во Илинг, западен Лондон, каде што лабуристите ја задржаа контролата врз советот. Тој додаде дека гласачите се повеќе загрижени за темпото на промените отколку за неговото лидерство.

Тој вети дека ќе ги објави чекорите потребни за промена во Велика Британија, најавувајќи ново „ресетирање“ на владата која бара начини на гласачите да им ја пренесе својата визија за земјата или да се соочи со кризата со трошоците за живот, дополнително влошена од конфликтите во Украина и Иран.

Главен победник на изборите е популистичката партија „Реформа на Велика Британија“ на Најџел Фараж, која освои повеќе од 350 места во советите во Англија.

Според резултатите што се очекуваат подоцна во текот на денот, партијата би можела да стане и главна опозиција во Шкотска и Велс, каде што владеат Шкотската национална партија и „Плејд Кимру“, партиите кои се за независност.

Првите резултати укажуваат на продолжување на распаѓањето на традиционалниот британски двопартиски систем предводен од лабуристите и конзервативците во повеќепартиска демократија. Аналитичарите го опишуваат тоа како една од најголемите трансформации во британската политика во последните сто години.

Некогаш доминантните лабуристички и конзервативни партии губат гласови од „Реформа на Велика Британија“, левоориентираната Зелена партија на другиот крај од политичкиот спектар, и националистите во Шкотска и Велс.