Поранешниот премиер на Чешка, Бабиш нападнат на предизборен митинг

Поранешниот премиер на Чешка, Андреј Бабиш денеска е хоспитализиран откако бил нападнат за време на предизборен митинг во градот Добра. Тој бил нападнат од маж со бастун.

Напаѓачот е приведен под обвинение за хулиганство.

– Бабиш е примен во болница во градот Фридек-Мистек на медицински прегледи, соопшти неговата десничарска популистичка опозициска партија Акција на незадоволни граѓани (АНО).

Премиерот на Чешка, Петр Фијала и министерот за внатрешни работи Вит Ракушан го осудија нападот, нарекувајќи го неприфатлив.

АНО, според анкетите, има добри шанси да победи на парламентарните избори во Чешка, што ќе се одржат на 3 и 4 октомври.

Бабиш, кој стана премиер во 2017 година, ги загуби парламентарните избори во 2021 година. Тој, исто така, се кандидираше за претежно церемонијалната функција претседател на изборите во јануари 2023 година, но загуби од пензионираниот армиски генерал Петр Павел.