Полицијата го идентификува осомничениот за смртоносното пукање во училиштето во Канада

Полицијата вчера го идентификува осомничениот напаѓач за смртоносното пукање во училиште во западна Канада како 18-годишна локална жена – пренесе ДПА.

Полицијата исто така го ревидира бројот на загинатите од масовното пукање во вторникот во провинцијата Британска Колумбија од 10 на девет лица вклучувајќи го и наводниот сторител. Меѓу нив има еден наставник, како и три ученички и двајца ученици на возраст од 12 до 13 години, соопштија тие.

Уште две тела – на 39-годишната мајка на осомничената и на нејзиниот 11-годишен полубрат – биле пронајдени во куќа недалеку од училиштето. Се верува дека 18-годишната девојка првин ги убила членовите на своето семејство пред да се упати кон училиштето.

Најмалку две од повредените лица се во сериозна состојба, соопшти полицијата.

Првично не беа соопштени информации за мотивите. Односот помеѓу осомничената и жртвите сè уште е дел од истрагата, соопшти полицијата.

Полициски службеник изјави дека итните служби биле повикувани на домашната адреса на осомничената неколкупати во последните години. За време на овие посети било одземено и оружје, рече тој, додавајќи дека во моментот нема регистрирано оружје на име на осомничената.

Тој зборуваше за проблеми со менталното здравје на осомничената, без да даде дополнителни детали. Тој исто така забележа дека полицијата ја идентификува осомничената бидејќи таа самата јавно се идентификувала на социјалните мрежи додавајќи дека при раѓањето била регистрирана како машко.

Полицијата во моментот нема информации за тоа дали таа доживеала малтретирање или дискриминација во училиштето, рече тој. Осомничената го напуштила училиштето пред четири години.

Во вчерашниот говор пред долниот дом канадскиот премиер Марк Карни го опиша Тамблер Риџ (Tumbler Ridge), каде што се случи пукањето, како „град на рудари, наставници, градежни работници – семејства што го изградиле својот живот таму, луѓе што секогаш биле тука едни за други“.

Тој исто така прогласи седумдневна национална жалост.