Орбан ја обвинува Украина за мешање во унгарските избори

Унгарија ќе го повика украинскиот амбасадор на разговори во врска со мешање на Украина во унгарските парламентарни избори закажани за 12 април, изјави денеска премиерот Виктор Орбан.

Орбан рече дека „украинските лидери, вклучувајќи го и претседателот Володимир Зеленски, минатата недела упатиле навреди и закани кон Унгарија“.

Во објава на социјалната мрежа „X“, тој додаде дека унгарските безбедносни служби заклучиле дека ова е координиран обид за влијание врз изборите и дека побарал од министерот за надворешни работи Петер Сијарто да го повика амбасадорот на разговори.

Зборувајќи на Светскиот економски форум во Давос, Зеленски рече дека „секој Виктор кој живее од европски пари додека се обидува да продава европски интереси заслужува шамар по шапката“, што Орбан го протолкува како директна порака до Унгарија.

Украинските власти сè уште не ги коментираа обвинувањата на Орбан.