Опозициската Демократската партија на Косово го избра Бедри Хамза за нов лидер

Главната опозициска партија во Косово, Демократската партија на Косово (ПДК) го избра Бедри Хамза за нов лидер, јави весникот „Коха Диторе“.

Хамза беше единствениот кандидат за функцијата и беше избран на вчерашниот партиски изборен состанок со мнозинство гласови, откако претходниот лидер на ПДК, Мемли Красниќи, поднесе оставка пред неколку дена.

Красниќи вчера изјави дека под негово водство, партијата се засилила во изминатите четири години и четири месеци, но Косово „ослабело“. Тој ја критикуваше владата на премиерот Албин Курти и рече дека тоа е уште една причина ПДК да стане уште посилна. Според него, на Демократската партија на Косово ѝ е потребен нов момент на единство, а нејзиниот лидер треба да биде и кандидат на ПДК за премиер.

Новоизбраниот претседател на партијата, Бедри Хамза, кој беше кандидат за премиер на овогодишните парламентарни избори во Косово, исто така им се обрати на членовите на партијата со повик за единство. Тој рече дека неговата главна амбиција ќе биде зајакнување на ПДК и Косово. Тој вети силно враќање на партијата и нови победи, јави Коха Диторе.

На прашањето дали би можел да соработува со владејачката партија на премиерот Курти, Движењето Самоопределување, Хамза рече дека нема црвени линии кон ниту една политичка сила. „Мислам дека треба да бидеме одговорни за интересите на земјата и секогаш да преземаме потребни мерки во корист на државата“, рече тој.

Пред Хамза да биде избран за нов лидер на партијата, заменик-претседателот на ПДК, Енвер Хоџај, го критикуваше процесот за избор на нов претседател. Според Хоџај, тој не бил демократски, бидејќи изборите за нов лидер требало да се одржат за една недела за да им се даде време на повеќе луѓе да ги објават своите кандидатури за функцијата.

Тој додаде дека процесот бил попречен од актуелниот претседател на партијата, Мемли Красниќи, кој при поднесувањето на оставката изразил поддршка за Хамза, што довело до тоа да нема еднакви услови за потенцијалните кандидати за функцијата. Сепак, Хоџај изјави дека ќе се согласи со што и да одлучат членовите на партијата.