Паз положи заклетва: Боливија се оддалечува од АЛБА и се приближува кон САД

Родриго Паз од Христијанско-демократската партија, кој победи во вториот круг од претседателските избори во Боливија одржан на 19 октомври, денеска положи заклетва како нов претседател на Боливија. Со тоа се означува почеток на нова ера за оваа земја по речиси 20 години левичарско владеење под Движењето за социјализам (МАС).

Паз положи заклетва пред пратениците и странските лидери, кревајќи ја десната рака пред Библијата и крстот. „Бог, татковина и семејство, се колнам“, рече тој пред да ја прими претседателската лента и одликувањата.

.На изненадување на голем број аналитичари, Паз го победи неговиот многу поистакнат десничарски противник, поранешниот претседател Хорхе Туто Кирога, во вториот круг од претседателските избори минатиот месец.

На инаугурацијата во боливискиот главен град Ла Паз присуствуваа претседателите на Аргентина, Чиле, Еквадор, Уругвај и Парагвај.

По победата, Паз се дистанцира од блокот АЛБА, чии членки се Боливија, Куба, Никарагва и Венецуела, и се приближи кон Соединетите Американски Држави, од кои неговата земја се оддалечи по протерувањето на американскиот амбасадор во 2008 година, за време на администрацијата на поранешниот претседател Ево Моралес.

Иако партијата на Паз е најголема во Собранието, таа нема мнозинство во ниту еден од двата дома на парламентот, па ќе мора да гради сојузи. Со оглед на тоа дека во Парламентот доминираат пробизнис и десно ориентирани партии, аналитичарите наведуваат дека тоа би можело да го олесни усвојувањето на пазарно ориентирани политики.

Паз, исто така, стапи во контакт со меѓународните финансиски институции во врска со можна програма за економска помош. Покрај тоа, тој постигна првичен договор со Андската развојна корпорација за заем од 3,1 милијарда долари за поттикнување на економското закрепнување во текот на следните неколку години.

Предизвикот пред Паз е да обезбеди надворешно финансирање и да спроведе политики кои може да бидат непопуларни, вклучувајќи намалување на субвенциите за енергија и преминувањето кон пофлексибилен девизен курс.