Калас: Патот на Молдавија кон ЕУ е неповратен

Патот на Молдавија кон ЕУ е неповратен, изјави денеска високата претставничка на Европската унија за надворешни работи и безбедносна политика Каја Калас на прес-конференција по десеттиот состанок на молдавскиот совет за асоцијација во Брисел.

Таа додаде дека прашањето за Транснистрија нема да влијае на европската перспектива на Молдавија. 

Калас изрази очекување за фер избори во Гагаузија. 

Во врска со влегувањето на руски беспилотни летала во молдавскиот воздушен простор, Калас истакна дека Русија ги загрозува животите на луѓето низ цела Европа. 

-Москва има за цел да сее страв и да спречи донесување одлуки, но нашиот одговор е поголема отпорност и поголема поддршка за Украина, додаде високата претставничка.

Еврокомесарката за проширување на ЕУ, Марта Кос, изјави дека Молдавија е меѓу најнапредните земји на патот кон пристапување во унијата. Според неа, може да се очекува до крајот на годината Кишињев да започне преговори за уште два кластера.

Молдавија денеска доби дополнителни 157 милиони евра од ЕУ во рамките на Планот за раст, со што вкупната поддршка достигна 661 милион евра. Средствата ќе бидат доделени на Кишињев за економски раст и создавање работни места, како и за подобрување на пристапот на земјата до единствениот европски пазар