Беким Сали на бизнис-форум во Истанбул: Европската интеграција отвора нови можности за инвестиции, развој и економски партнерства

Првиот заменик-претседател на Владата и министер за европски прашања Беким Сали учествуваше на бизнис -орумот Северна Македонија – Турција, што се одржува во Истанбул, каде што ја истакна важноста од продлабочување на економската соработка и создавање нови партнерства меѓу двете земји.

Во обраќањето Сали нагласи дека Северна Македонија и Турција негуваат исклучително блиски и пријателски односи изградени врз доверба, заемна почит и долгорочно партнерство. Тој истакна дека Турција е еден од најзначајните економски партнери на државата, со значајно присуство на турски компании во индустријата, инфраструктурата, банкарството, образованието и туризмот, кои придонесуваат за економскиот развој и отворањето работни места – информира прес-службата на Министерството за европски прашања. 

Осврнувајќи се на владините приоритети, министерот Сали потенцира дека реформската агенда и планот за раст на Европската Унија за Западен Балкан претставуваат значајна можност за економски напредок и поголема конкурентност.
– Првпат европската интеграција е директно поврзана со конкретни инвестиции, економски раст и постепена интеграција во единствениот европски пазар. Тоа создава нови можности за компаниите, инвеститорите и граѓаните – рече Сали.

Тој ги охрабри турските компании активно да ги искористат можностите што ги нудат ИПА-фондовите, планот за раст на ЕУ и инвестициската рамка за Западен Балкан (WBIF) посочувајќи дека коридорите VIII и X остануваат стратешки инфраструктурни проекти од регионално значење.

Сали нагласи и дека постои голем потенцијал за соработка во обновливите извори на енергија, дигиталната трансформација, иновациите, современите технологии и производствениот сектор оценувајќи дека европската интеграција претставува процес на модернизација, конкурентност и просперитет.