Мисајловски: Армијата ќе остане во Гостивар сѐ додека е потребна помошта

Армијата останува ангажирана во Гостивар и ќе продолжи да им помага на граѓаните сѐ додека има потреба, изјави министерот за одбрана Владо Мисајловски при денешната посета на касарната „Мирче Ацев“ во Прилеп.

Тој информираше дека Армијата веќе неколку дена е на терен, каде со цистерни со техничка вода и друга опрема им дава поддршка на институциите и на населението погодено од непогодите.

-Од пред неколку дена сме присутни во Гостивар со голем број цистерни со техничка вода и со сета расположлива опрема. Ќе останеме таму сѐ додека има потреба. Сè што ќе биде побарано од нас, согласно координацијата со Министерството за внатрешни работи, Управувачкиот комитет и заклучоците на Владата, Армијата ќе го стави на располагање на граѓаните- изјави Мисајловски.

Министерот нагласи дека Армијата интервенира секогаш кога е потребно, без разлика дали станува збор за пожари или други природни непогоди, оценувајќи дека војниците се „урбани херои“ кои секогаш се подготвени да помогнат.

Во моментов Армијата работи на седум локации, а, како што истакна Мисајловски, пристигнуваат и нови барања за ангажман, на кои ќе биде одговорено согласно можностите.