„Синдром Нора“ нова премиера на штипскиот Театар

„Синдром Нора“ е новата претставата на штипскиот Театар, во режија е на познатата македонска режисерка Наташа Поплавска, а текстот на Весна Куслеска (по мотиви на ”Нора” од Хенрик Ибзен). Премиерата на „Синдром Нора“-кабаре е утревечер во 20 часот, на сцената на Театар Штип.

-„Синдром Нора” не е само приказна за Нора. Ова е приказна за сите што некогаш живееле според туѓи очекувања, туѓи правила, туѓи стравови и туѓа претстава за среќа. Во ова терапевтско кабаре, ликовите од „Нора“ на Хенрик Ибзен излегуваат од своите улоги и се соочуваат со она што долго го премолчувале. Нора, Торвалд, Кристина, Крогстад, Ранк, Ана Марија, Боб, Ивер и Еми не се само драмски ликови. Тие се симптоми на еден ист систем. Систем што учи како да се трпи, како да се молчи, како да се биде „добар“, „пристоен“, „корисен“ – дури и кога тоа значи да се изгубиш себе си, информираат од Театар Штип. 

Оваа претстава зборува за наследениот срам, за саможртвата, за љубовта што станува кафез, за децата што ги наследуваат тишините на своите родители. 

-А над сето тоа стои МС Нора – Нора од иднината, Нора што веќе ја затворила вратата зад себе и сега се враќа да нè праша: Колку од нас се уште играат улога во сопствениот живот – наместо да го живеат-велат од Театар Штип. 

Во претставата играат: Марија Минчева Андонов, Кристина Атанасова Арсова, Анѓелка Нашкова,Стефанија Митовска, Елена Шорова Дербов, Миле Вратеовски, Никола Кузелов и Мирко Голомеов. Музичари се Горан Лазаревски и Симе Панев.