Песков: Путин е подготвен да преговара со Европа, но нема прв да иницира дијалог

Рускиот претседател Владимир Путин е подготвен да преговара со „сите“, вклучително и со Европејците, соопшти Кремљ денеска, откако „Фајненшл тајмс“ објави дека раководството на Европската унија се подготвува за потенцијални разговори.

Фајненшл тајмс вчера објави дека пресвртот на Европската унија е поттикнат од фрустрацијата од преговорите за завршување на војната во Украина, предводени од американскиот претседател Доналд Трамп.

Претседателот на Европскиот совет, Антонио Кошта, рече дека верува оти постои „потенцијал“ за преговори на ЕУ со Путин и дека алијансата има поддршка од украинскиот претседател Володимир Зеленски.

„Путин е подготвен да преговара со сите. Тој го повтори ова неколку пати“, изјави портпаролот на Кремљ, Дмитриј Песков, пред новинарите кога беше прашан за статијата на ФТ.

„Ќе бидеме подготвени да напредуваме во дијалогот колку што Европејците се подготвени да го сторат тоа. Меѓутоа, како што веќе нагласи Путин, нема да иницираме такви контакти по ставовите што ги зазедоа Европејците“.

Русија верува дека европските влади се тие што мора да го направат првиот потег, бидејќи тие се оние што ги прекинаа контактите со Москва во 2022 година по почетокот на војната во Украина.

„Руската страна не беше иницијатор за целосен прекин на нашите односи со ЕУ“, рече Песков. „Тоа беше иницирано од Брисел и одредени европски престолнини“.

Европските лидери претходно нагласија дека Русија мора да биде поразена во Украина и го опишаа Путин како воен злосторник и автократ кој, според нивните тврдења, еден ден би можел да нападне членка на НАТО ако му се дозволи да победи.