Адвокатката предупредува: Животот на нобеловката Мохамади е во сериозна опасност

Затворената иранска активистка за човекови права и добитничка на Нобеловата награда за мир, Наргес Мохамади, е „меѓу животот и смртта“, предупредија нејзините поддржувачи, пренесува ДПА.

– Никогаш досега не сме се плашеле толку за животот на Наргес; таа може да нè напушти во секој момент – изјави нејзината адвокатка Ширин Ардакан во Париз. – Не се бориме само за нејзината слобода, туку и за да ѝ го одржиме срцето да чука. Денес постои ризик од смрт; мора да дејствуваме пред да биде предоцна – додаде таа.

Џонатан Дагер, регионален директор за Блискиот Исток на организацијата „Репортери без граници“, изјави дека „првпат се користат зборовите ‘меѓу животот и смртта’“ за состојбата на Мохамади. Нејзините поддржувачи официјално се обратија до високиот комесар на Обединетите нации за човекови права, Фолкер Тирк, барајќи да се заложи за неа.

Адвокатката посочи дека двете деца на Мохамади и нејзиниот сопруг живеат во Париз и го повика францускиот претседател Емануел Макрон да заземе цврст став во овој случај. „Очекуваме претседателот да заземе силна позиција“, изјави Ардакан.

Мохамади ја доби Нобеловата награда за мир во 2023 година за нејзината борба против угнетувањето на жените и против смртната казна во Иран.

Педесет и четиригодишната активистка се наоѓа во болница во Занџан, во северозападен Иран, каде што издржува затворска казна. Според извештаите, таа е префрлена на оддел за интензивна нега поради сериозни срцеви проблеми. Се наведува дека страда од нестабилен крвен притисок и силна мачнина.

Во април, нејзиниот брат Хамид-Реза Мохамади предупреди дека нејзината здравствена состојба е загрижувачка. Нобеловата лауреатка во февруари повторно беше осудена на повеќегодишна затворска казна по обвиненија за заговор и за пропагандни активности, а дополнително ѝ е изречена и двегодишна забрана за патување.