Доживотен затвор за двајца обвинети за нападот во Бањска, третиот осуден на 30 години

Судот во Приштина денеска осуди тројца мажи за тероризам поради нападот во селото Бањска, во северниот дел на Косово во 2023 година, кога вооружени напаѓачи влегоа во селото и се судрија со полицијата, при што загинаа тројца напаѓачи и еден полицаец.

Судот ги осуди Благоје Спасојевиќ и Владимир Толиќ на доживотен затвор, додека Душан Максимовиќ доби казна од 30 години затвор.

„Со добро организиран план и насилство, користејќи тешко вооружување, се обиделе да го отцепат северниот дел на Косово, односно општините населени претежно со Срби, и да го припојат кон Србија“, изјави судијата Нгадим Арни.

Во престрелката загинаа тројца напаѓачи и еден косовски полицаец. Останатите напаѓачи побегнале во Србија преку планинскиот терен, оставајќи зад себе возила полни со оружје, муниција и експлозив.

Обвинението опфаќа повеќе од 40 лица кои сè уште се во бегство, а косовските власти тврдат дека се кријат во Србија.

Инцидентот во Бањска е најтешкиот безбедносен случај на Косово од прогласувањето на независноста во 2008 година. Приштина ја обвинува Србија за нападот, што Белград го негира.

– Сега останува Србија да одговара за својата политичка, финансиска и логистичка улога во оваа агресија – изјави косовскиот министер за внатрешни работи, Џељаљ Свечла, по изрекувањето на пресудата.

Меѓу обвинетите е и водачот на групата, Милан Радоичиќ, поранешен политички претставник на косовските Срби и близок соработник на српскиот претседател Александар Вучиќ. Радоичиќ живее во Србија и јавно призна учество во вооружениот судир.